Сильвестровская редакция Древнерусский вариант

Информация: 'Домострой' - русский литературный памятник XVI в. Представляет собой тщательно разработанный свод правил общественного, религиозного и в особенности семейно-бытового поведения. Предполагают, что 'Домострой' возник в XV в. в среде богатого новгородского боярства и купечества. Автор его пользовался литературными источниками в виде сборников 'слов' и поучений ('Измарагд', 'Златоуст', 'Златая цепь' и др.). 'Домострой' служил правящему классу нравственным кодексом. В середине XVI в. переработан приближённым молодого царя Ивана IV Васильевича протопопом Сильвестром, который заключил изложение 'Домостроя' посланием к своему сыну Анфиму. Содержит ценные сведения о социальном укладе в Русском государстве, даёт подробное описание повседневной жизни родовитого боярства и купечества со множеством бытовых подробностей. Написан в большей своей части живым языком, местами украшен пословицами и поговорками.

1. Наказание от отца к сыну
Благословляю аз грешныи имярек, и поучаю и наказую, и вразумляю сына своего имярек и его жену и их чад, и домочадцов быти во всяком християньском законе, и во всякои чистои совести и правде, с верою творяще волю Божию и храняще заповеди Его, себе утвержающе во всяком страсе Божии, и в законном жительстве, и жену поучающе, тако же и домочадцов своих наказующе, не нужею ни ранами ни работою тяжкою, имеюще яко дети во всяком покои, сыты и одены и в теплом храме, и во всяком устрои и вдаю вам християньскому жительству, писание се на память и вразумление вам и чадом вашим, аще сего моего писания не внемлете и назания не послушаете, и потому не учнете жити и не тако творити яко же есть писано, сами себе ответ дадите в день Страшнаго Cуда, и аз вашим винам и греху не причастен, кроме моея душа аз о сем о всяком благочинии благословлял, и плакал, и молил, и поучал, и писание предлагал вам, и аще восприимите сие мое худое учение и грубое наказание, и сие писание со всею чистотою душевною прося у Бога помощи и разума поелико возможно как Бог вразумит и начнете делом творити вся се будет на вас милость Божия и Пречистые Богородицы, и великих чудотворцов, и нашего благословления отныне и до века, и дом ваш и чада ваши и стяжание ваше и обилие что вам Бог подаровал от своих трудов да будет благословенно и исполнено всяких благ во веки. Аминь.


2. Како християном веровати во Святую Троицу и пречистую Богородицу и Кресту Христову и святым Небесным силам и всем святым и честным и святым мощем и поклонятись им
Подобает убо всякому християнину ведати како по Бозе жити в православнои вере християньстеи первое убо от всея души веровати во Отца и Сына и Святаго Духа в неразделную Троицу и воплощению Господа нашего Исуса Христа Сына Божия веруи и рождьшую Его Матерь Богородицу нарицаи Кресту же Христову с верою покланяися яко на том всем человеком спасение содела Господь. И понеж иконе же Христове и Пречистои Матере Его и святым Небесным бесплотным силам и всем святым честь воздаи яко сам любовь. <... В молитве си глаголи, и поклоняние твори, и на помощь к Богу призываи их, мощи же святых с верою целуи и покланяися им.



3. Како таинам Божиим причащатися и веровати воскресению мертвых, и Страшнаго Суда чаяти и касатися всякои святыни
Таинам Божиим веруи, телу Его, крови веруи причащатися и со страхом, на очищение и освящение души же и телу и во оставление грехом и в жизнь вечную, веруи воскресению мертвым и жизни будущаго века, помяни Страшныи Суд, и воздаяние по делом будет нам, аще когда приочистив себе духовно в чистои совести с молитвою, и с молением целовати Животворящии Крест, и святыи честныи образы чюдотворные многоцелебныя мощи по молении прекрестяся поцеловати дух в ceбе удержав, а губ не разеваючи а благоволит Бог кому причасьтитися Божественных Христовых Таин ино лжицею от иерея приимати во уста опасно губами не сверкати руце имети к персем согбени крестаобразно, а дора и просфира и всякая святая вкушати бережно крохи на землю не уронити, а зубами просфиры не кусати яко же прочии хлеб уломываючи невелики кусочки класти в рот ести губами и ртом не чавкати со опасением ести а просфиры с вологою не ести токмо воды прихлебывати или укропу с вином служеным или без вина, а иного ничего не примешати преже всякия ествы свершати просфира в церкви или в дому, а и с кутьею никако же просфиры не ести ни с кануном и на кутью просфиры не класти, аще с кем о Христе целование сотворити, такоже дух в себе удержав поцеловатися а губами не плюскати поразсуди человеческия немощи нечювьственаго духа гнушаемся чесночного хмельного, болного и всякого смрада коль мерско Господеви нашь смрад, и обонание, сего ради со опасением творити.



4. Како любити Бога от всея душа, тако же брата своего и страх Божии имети и память смертную
Посем же возлюбиши Господа Бога твоего от всея душа своея и подвигни вся твоя дела и обычаи и нравы угодная творити по заповеди Его, паки жи искреняго си возлюби всякаго человека по образу Божию созданна рекше всякаго християнина, страх Божии всегда имеи в сердцы своем, и память смертную всегда волю Божию творити, и по заповедем Его ходи рече Господь в чем тя застану в том и сужу, ино достоит всякому християнину готову быти в добрых делех в чистоте и в покоянии и во всяком исповедании всегда чающее часа смертнаго.



5. Како святительскии чин почитати, тако же и священническии чин и мнишескии
Ко святительскому чину всегда прибегаи, и должную честь им воздаваи и благословения и духовнаго поучения от него требуи от них, и припадаи к ногам их, и во всем повинуися им по Бозе священническому чину и мнишескому велию веру и любовь и повиновение, и всякое покорение пред ними имеи, и духовную ползу от них внимаи те убо суть слуги и молебники Небеснаго Царя имеют дерзновение у Господа, просити добрых и полезных душам нашим и оставление грехов и жизни вечьныя.



6. Како посещати в монастырех и в болницах и в темницах и всякаго скорбна
В монастыри, и в болницы и в пустыни и в темницы закълюченных посещаи и милостыню и сил всяких потребных подаваи елико требуют, и види беду их и скорбь и всяку нужу елико возможно помогаи им и всякаго скорбна и бедна и нужна и нища не презри, введи в дом свои напои накорми согреи одежи всею любовию и чистою совесьтию теми милостива Бога сотвориши и свободу получиши а родителем своим преставльшимся память твори к церквам Божиим приношение и в дому по них кормлю твори нищим милостыню и сам от Бога помяновен будеши.



7. Како царя и князя чтити и повиноватися во всем и всякому властелю покарятися и правдою служити им во всем, к большим и к меншим, и скорбным и маломощным ко всякому человеку какову быти, и себе о сем внимати
Царя боися и служи ему верою и всегда о нем Бога моли и ложно отнюд не глаголи пред ним но с покорением истину отвещаи ему яко самому Богу, и во всем повинуися ему аще земному царю правдою служиши и боишися его тако научишися и Небеснаго Царя боятися сеи временен а Небесныи вечен, и Судия нелицемерен, воздаст комуждо по делом его, тако же и князем покаряитеся и должную ему честь воздаваи яко от Него посланом во отмщение, злодеем, в похвалу же добродеем князю своему прияите всем сердцем и властелем своим ни помыслите на ня зла глаголет бо Павел апостол вся владычество от Бога учинена суть, да аще кто противится властелем, то Божию повелению противитца а царю и князю и всякому велможе и клеветою и лукавеством погубит Господь вся глаголющая лжу а шепотники и клеветники от народа проклятии суть стареишим себе честь воздаваи и поклонение твори средних яко братию почитаи, маломожных и скорбных любовию привечаи юнеиших яко чада люби, всякому созданию Божию не лих буди славы земныя ни в чем не желаи вечных благ проси у Бога всякую скорбь и тесноту з благодарением терпи обидим не мсти хулим моли зла за зло не воздаваи согрешающая не ссужаи воспомяни своя грехи о тех крепко пекися злых мужеи совету отвращаися буди ревнитель правожительствующим и тех делания написуи, в сердцы своем и сам тако ж твори.



8. Како дом свои украсити святыми образы дом чист имети
В дому своем всякому християнину во всякои храмине святыя и честныя образы написаны на иконах по существу ставити на стенах устроив благолепно со всяким украшением и со светилники, в них же свещи пред святыми образы возжигаются на всяком славословии Божии, и по пении погашают завесою закрываются всякия ради чистоты, и от пыли благочиния ради и брежения, а всегда чистым крылышком ометати, и мяхкою губою вытирати их и храм тот чист держати всегда а к святым образом касатися достоиным в чистеи совести и на словословии Божии, и на святом пении, и молитв свечи вжигати, и кадити благовонным ладоном и фимияном, а образы святыя поставляются, иже в начале по чину свято почитаеми суть имяны прежереченными, в молитвах и во бдениих и в поклонех, и во всяком славословии Божии всегда почитати их со слезами и с рыданием и сокрушеным сердцем исповедатися, просяще отпущения грехом.



9. Како к церквам Божиим и в монастыри с приношением приходити
А к церквам Божиим всегда с верою приходити с приношением с свечею и с просфирою с фимияном и с ладоном, с каноном, и с кутьею и милостынею и за здравие и за упокои и к празником, и по монастырем тако с милостынею и с приношением приходити егда принесеши дар свои ко олтарю воспоминаи еуаггельское слово егда нечто имать брат твои на тя остави ту дар свои пред олтарем и шед смирися з братом своим прежде, тогда принеси дар свои к Богу от праведнаго своего имения от неправды неприятна милостыня к силным речено бысть луче не грабити неже милостыня даяти от неправды отдаи обидимому приятнее милостыни, а к Богу приятна милостыня от праведнаго стяжания и от добрых дел.



10. Како священников и иноков в дом свои призывати молитися
Кипа в которые любо празники по обещанию своему да призывают священническии чин в дом свои елико по силе, и молебная совершают о всяком прошении и молят за царя и великаго князя имярек всея Руси самодержца, и за его царицу и великую княгиню имярек, и за их благородныя чада, и за братью его и за боляре, и за все христолюбиво воиньство иже победу на враги и о плененых свободе, и о всем священническом и иноческом ящаго, а от стола или от трапезы ества и питие таино износити или высылати не по повелению настоящаго и без благословения святотаство суть и самочиние таковых всячески бесчествуют, егда зван будеши ким на брак не седи на преднем месте егда кто честнее тебе будет званных им и пришед иже тебе звавыи оного речет ты даждь сему место, и тогда начнеши со студом посьледнее место держати но егда зван будеши шед сяди на последнем месте, да егда приидет звавыи тя и речет ти друже посяди выше, тогда будет ти слава предвозлежащими с тобою, яко всяк возносяися смирится а смиряися вознесется егда на трапезе предпоставят ти многоразличныя яди и пития егда кто честнее тебе будет званных не начни вкушати преже ничто же, аще ты начальстьвен будеши, предпоставленую ядь разсужая начинаи. У неких боголюбцев изообилно бывает вкушение и питие и излишнее цело снимают, и вперед иным на потребу пригожается и аще кто нечювьствен, и не искусен и не учен, и невежда не рассуждая всякаго брашна в пресыщения начинает, и небрегомо творит, будет и сам поруган и посмеян и обещестен от Бога и от человек.



11. Како кормити приходящих в дому з благодарением
Егда трапезу предпоставляеши вначале священници Отца и Сына и Святаго Духа прославляют потом Девицу Богородицу, и егда ядяху з благодарением и с молчанием или з духовною беседою, тогда Аггели невидимо предстоят и написуют дела добрая и ества и питие в сладость бывает аще начнет предпоставленую еству и питие похулять тогда мотыло обращается сии вкушают и аще скаредныя речи и блудные срамословие и смехотворение, и всякое глумление или гусли и плесание и плескание, и скокание и всякие игры и песни бесовские тогда якоже дым отгонит пчелы такоже и отыдут, Аггели Божии от тоя трапезы и смрадныя беседы и возрадуются беси и приидут волю свою улучив и вся угодная творится им да такоже бесчиньствуют и зернью и шахматы, и всякими играми бесовскими тешатся, дар Божии еству и питие, и всякие овощи, в поругание помещут и проливают друг друга шибают и обливают всячески поругаются дару Божию, а дияволи записуют дела их приносят к сотане и вкупе радуются погибели християньския и та вся дела предстанут в день Страшнаго Суда. О горе деющим таковая егда жидове седоша ясти в пустыни и пити, и обьядшася и опившеся и восташа играти, и блуд творити, и тогда пожре земля их двадесят тысящь и три тысящи. О устрашитеся людие творите волю Божию якоже есть в законе писано а от сего злаго бесчиния соблюди Господи всякаго, християнина, ести бы и пити в славу Божию а не обьядатися ни упиватися ни пустошных творити и аще пред кого поставляеши еству или питие и всякое брашно или пред тобя поставят, всякаго брашна не подобает похулити глаголати гнило или кисло или пресно или солоно или горко или затхлося или сыро или переварено или какую ни буди хулу возлогати, но подобает дар Божии всякое брашно похваляти, и со благодарением, вкушати ино Бог обоняет вонею благо ухания и в сладость претворити и аще которая ества или питие непотребно ино о том наказывати домочадцов кто то делал штобы впред таково не было.



12. Како мужу з женою и з домочатцы в дому своем молитися
По вся дни в вечере муж ж женою, и з домочадцы кто умеет грамоте, отпети вечерня павечерница полунощница с молчанием и со вниманием и с кротъкостоянием и с молитвою и с поклоны пети внятно и единогласно после правила отнюд ни пити ни ести, всегда всяму тому наук а ложася спати всякому, християнину по три поклона в землю положити, а в полунощи всегда таино встав со слезами прилежно к Богу молитися елико вместимо о своем согрешении а утре воставая такоже и комуждо по силе и по желанию а не празным женам кланятися до пояса всякому християнину молитися о своем согрешении и пущения грехом и о царском, и о царицине и о чадех их, здравии и о братии его и о болярех его и о христолюбивом воиньстве о помощи на враги и о плененых свободе, и о святительском и священническом чину, и о болящих и в темницах заключеных и за вся християне, жене молитися о своем согрешении и о мужи и о чадех и о домочадцех и о сродникех и о отцех духовных а мужу такоже а утре встав Богу молитися и отпети заутреня и часы а в неделю и в празник молебен с молитвою и молчанием и с кротъкостоянием и единогласно пети и со вниманием слушати и святым кажение а где некому пети ино молитися доволно вечере и утре, а мужем отнюд не погрешити по вся дни церковнаго пения вечерни заутрени обедни.



13. Како в церкви мужу и жене молитися чистота хранити и всякого зла не творити
А в церкви стояти на всяком пении со страхом и с молчанием молитися а дома всегда павечерница и полунощница и часы пети а кто прибавит правила своего ради спасения ино то на его воли ино боле мзда от Бога а женам ходити к церкви Божии как въместимо на произволение по совету с мужем а в церкви ни с кем не беседовати с молчанием и послуша стояти никуда не обзираяся ни на стену не прикланятися ни к столпу ни с посохом не стояти ни с ноги на ногу не преступати, руце согбени к персем крестообразно твердо и непоколебимо молитися со страхом и трепетом, и со воздыханием, и со слезами и до отпения из церкви не исходити, а приити к началу, а неделя и празники Господския и среду и пяток, и святыи пост и Богородичен в чистоте пребывати а от обьядения и пияньства и от пустошных бесед и смехотворения неподобнаго всегда беречися и от татбы и от блуда и лжи и клеветы, и зависти и всякаго неправеднаго собрания и ростов и корчмы и мыта, и перевозов и мостовщин и всякаго лукавества не любити и не гневатися ни на кого ранного пития и ядения и позного после пения отнюд не творити есть бы и пить в славу Божию, и в подобно время малым детем и работным по разсужению мужа и жены кормити их, или не весте яко неправедницы Царствия Божия не наследят, якоже апостол Павел рече аще некии брат именуем, или блудник или лихоимец или идолослужитель или ругатель или пьяница или хищник с таковыми ни ясти ни пити и паки рече ни идолослужители ни прелюбодеи ни сквернителя ни малакия ни мужеложницы ни лихоимцы ни татие ни пьяницы ни досадителе, ни хищницы Царствия Божия не наследят но достоить от всякаго зла блюстися всякому християнину.



14. Како чтити детем отцов своих духовных и повиноватися им
Подобает ведати се како чтити детем отцев своих духовных изыскати отца духовнаго добра боголюбива и благоразумна и разсудителна а не потаковъника пьяницу, ни сребролюбива, ни гневлива такова подобает чтити и повиноватися ему во всем икаятися пред ним со слезами исповедати грехи своя не стыдно и безсрамно и заповеди его хранити а призывати его к себе в дом часто и извещатися всегда во всякои совести, и наказание его с любовию приимати, и послушати его во всем и чтити его, и беите челом пред ним ниско он учитель нашь и наставник, и имеите его со страхом, и любовию к нему приходити и приношение ему даваите, от своих трудов по силе, и советовати с ним часто, о житии полезном и востязатися от грехов своих, и како учити и любити мужу жена своя и чада, а жене мужа своего слушати, и спрашиватися по вся дни а извещатися о гресех своих всегда пред отцем духовным, и обнажати грехи своя вся, и покарятися пред ним во всем тии бо бдят, о душах наших, и ответ дадут о нас в день Страшнаго Суда, а не поносити их ни осужати ни укоряти а о ком учнут печаловатися, ино его слушати и виноватаго пожаловати по вине смотря с ним же разсудя.



15. Како детеи своих воспитати во всяком наказании и страсе божии
А пошлеть Бог у кого дети сынове или дщери, ино имети попечение отцу и матери о чадех своих снабдити их и воспитати в добре наказании и учити страху Божию и вежству и всякому благочинию и по времени и детем смотря и по возрасту учити рукоделию матери дщери а отцу сынове кто чево достоин каков кому просуг Бог даст любити их и беречи и страхом спасати уча и наказуя и разсужая раны возлогати наказуи дети во юности покоит тя на старость твою, и хранити и блюсти о чистоте телеснои и от всякаго греха отцем чад своих якоже зеницу ока и яко своя душа аще что дети согрешают отцовым и матерним небрежением им о тех гресех ответ дати в день Страшнаго Суда, а дети аще не брегомы будут в ненаказании отцов и матереи аще что согрешат или что сотворят и отцем и матерем з детми от Бога грех а от людеи укор и посмех, а дому тщета а себе скорбь и убыток а от судеи продажа и соромота аще у богобоязнивых родителеи, и у разумных и благоразсудных чада воспитани в страсе Божии и в добре наказании и в благорассудном учении всякому разуму и вештву и промыслу и рукоделию, и те чада с родители своими бывают от Бога помиловании а от освященнаго чину благословены а от добрых людеи хвалими, а в совершене возрасте добрые люди с радостию и з благодарением женят сынов своих по своеи версте по суду Божию а дщери за их дети замужь выдают, и аще от таковых которое чадо Бог возмет в покаянии и с причастием то от родителю безскверная жертва, к Богу приносится и в вечныя кровы вселяются а имеют дерзновение у Бога милости просити и оставления, грехов и о родителех своих.



16. Како чад воспитати с наделком замужь выдати
А у кого дочь родится ино разссудны люди от всякаго приплода на дочерь откладывают на ее имя или животинку ростят с приплодом а у полотен и у вусчин и у ширинок и у вубрусов, и рубашек, по вся годы еи в пришеннои сундук кладут, и платье, и саженье, и монисто и святость и суды оловяные и меденые, и деревяные прибавливати непомношку всегда а не вдруг себе не в досаду а всево будет полно, ино дочери растут, а страху Божию и вешътву учатся, а приданое с ними вдруг прибывает и как замужь зговорят ино все готово, а толко ранее хто о детех не смышляет да как замужь давать и в ту пору все покупать ино скорая женитва видомая работа а по судбам Божиим толко та дочь преставится ино ее наделком поминают по еи души сорокоуст и милостыню ис того дают а толко иные дочери есть тако ж о них промышляти.



17. Како дети учити и страхом спасати
Казни сына своего от юности его и покоит тя на старость твою и даст красоту души твоеи и не ослабляи бия младенца, аще бо жезлом биеши его не умрет но здравие будет ты бо бия его по телу, а душу его избавляеши от смерти, дщерь ли имаши положи на них грозу свою соблюдеши я от телесных да не посрамиши лица своего да в послушании ходит да не свою волю приимеши и в неразумии прокудит девство свое, и сотворится знаем твоим в посмех и посрамят тя пред множеством народа аще бо отдаси дщерь свою бес порока то яко велико дело совершиши и посреди собора похвалишися при концы не постонеши на ню любя же сына своего учащаи ему раны да последи о нем возвеселишися казни сына своего измлада и порадуешися о нем в мужестве и посреди злых похвалишися и зависть приимут враги твоя, воспитаи детище с прещением и обрящеши о нем покои и благословение, не смеися к нему игры творя в мале бо ся ослабиши в велице поболиши скорбя и после же яко оскомины твориши души твоеи, и не даж ему власти во юности но сокруши ему ребра донележе растеть а ожесъточав не повинет ти ся и будет ти досажение и болезнь души и тщета домови погибель имению и укоризна от сусед и посмех пред враги пред властию платежь и досада зла.



18. Како детем отца и мати любити и беречи и повиноватися им и покоити их во всем
Чада послушаите заповеди Господни, любите отца своего и матерь свою и послушаите их, и повинуитеся им по Бозе во всем, и старость их чтите, и немощь их и скорбь всякую от всея душа понесите на своеи выи, и благо вам будет и долголетны будете, и прославитеся от человек, и дом его будет благословен в веки, и насьледит сыны сынов твоих и досьтигнет старости маститы во всяком благоденьстве дни своя препровожают аще ли кто злословить или оскорбляет родителя своя или кленет или лает сии пред Богом грешен от народа проклят аще кто биет отца и матерь от церкви и от всякия святыни да отлучится, и лютою смертию и градцкою казнью да умрет, писано бо есть отча клятва иссушит а матерня искоренит сын или дщерь, не послушьливы отцу или матери, в пагубу им будет и не поживут днеи своих иже прогневают отца и досажают матери. Мнится не согрешяя к Богу, и есть поганого горее, и обещник есть нечестивым о них же пророк Исаия рече возмется нечестивыи да не видит славы Господня, сих нечестивыи именова, иже бесчествуют родителя своя и паки насмехающагося отцу и укаряюща старость материю да ськлюют их вранове и снедят орли, честь же творяи отцу, и матери и повинующеся им по Бозе во всем, возвеселитися имут о чадех своих и в день печали избавит их Господь, Бог, и молитву их услышит егоже просят подаст им вся благая, покояи матерь свою волю Божию творит и угожаяи отцу во благих поживет вы же чада делом и словом угожаите родителем своим во всяком блазе совете да благословени будете от них отчее благословение дом утвердит, и матерня молитва от напасти избавит аще ли оскудеют разумом в старости отец или мать не бесчествуите их ни укаряите да от своих чад почтени будете, не забываите труда материя и отцова, яже о вас болезноваша и печални быша покоите старость их и о них болезнуите якож они о вас не глаголи много сотворих им добра одеянием и пищею и всякими потребами но ни си свободи сим не можеши бо ею родити и тако ею болети, яко она о тебе тем же со страхом раболепъно служити им да и сами от Бога мзду приимете и жизнь вечную наследите яко свершители заповеди Его.



19. Како всякому человеку рукодельничати и всякое дело делати благословяся
В домовитом обиходе и везде всякому человеку государю или государыни или сыну или дщери или служке мужеска полу, и женьска и стару и малу всякое дело начати или рукоделничати, или ести или пити или ества варити или печи што и всякие приспехи делати и всякое рукоделие и всякое мастерьство, и устроив собя очистив от всякия скверны и руки умыв чисто преже святым покланятися в землю а по нужи или до пояса кто умеете достоино, проговорити да благословясь у настоящаго да молитву Исусову проговоря да перекрестяся молвя Господи благослови Отче тож начати всякое дело ино тому Божия милость поспешествует Аггели невидимо помогают, а беси отбегнут и то дело Богу в честь а души на пользу и ести и пити, з благодарением ино сладко а што впрок зделано ино мило а делати с молитвою, и з доброю беседою или с молчанием а делаючи што ни буть начнется слово празное или хулное или с роптанием или смехи или кощуны, или скверныя и блудныя речи от такова дела а от таковыя беседы Божия милость отступит; Аггели отъидут скорбни, ивозрадуются нечестивии демони, видя волю свою содевающу безумнии християне и приступят ту лукави влагающе в мысль всякую злобу и всякую вражду и ненависть и подвизают помыслы на блуд и на гнев, и на всякие кощуны и сквернословие и на всякое зло ино, то уже дело, ества или питие не споро, и всякое мастерство и всякое рукоделие не о Бозе свершается, Богу на гнев, а людем не благословленое не потребно и не мило, и не прочно а ества и питие не укусна и не сладъка только врагу и его слугам угодно и сладко, и радостно, а къто в естве, и в питии и во всяком рукоделии не чисто стряпает, и во всяком мастерьстве што украдет или прилжет, или божитца на криве не толко зделано или не в толке стало а он лжет и те все дела не угодны Богу беси написуют, и в том во всем человеку истязану быти в день Страшнаго Суда.



20. Похвала женам
Аще дарует Бог жену добру дражаиши есть камени многоценнаго таковая от добры корысти не лишится, делает мужу своему все благожитие, обретши волну и лен сотвори благопотребно рукама своима, бысть яко корабль куплю деющи издалече збирает в себе богатество и востает из нощи и даст брашно дому и дело рабыням, от плода руку своею насадит, тяжание много, препоясавше крепко чресла своя утвердит мышца своя на дело и чада своя поучает, тако же и раб, и не угасает светилник ея всю нощь руце свои простирает на полезная, лакти же своя утвержает на вретено, милость же простирает убогу плод же подает нищим, не печется о дому муж ея многоразлична одеяния преукрашена сотвори мужу своему и себе и чадом, и домочадцем своим, всегда же мужь бысть в соньмищи с вельможи и сядет знаемым вельми честен быст, и благоразумно беседова разумеет яко добро делати никто же без труда венчан будет, жены ради добры блажен мужь и число днии его сугубо, жена добра веселит мужа своего и лета его исполнить миром, жена добра часть блага в части боящихся Господа да будет, жена бо мужа своего честне творяще, первие Божию заповедь сохранив благословена будет, а второе от человек хвалима есть, жена, добра, и страдолюбива и молчалива, венец есть мужеви своему обрете мужь жену свою добру износит благая из дому своего, блажен есть таковые жены мужь и лета своя исполняют во блазе мире, о добре жене хвала мужу и честь.



21. Наказ мужу и жене и людем и детем како лепо быти им
Дa самому себе государю и жену и детеи и домочадцов своих учити не красти не блясти не солгати не оклеветати, не завидети, не обидети, не клепати, чюжаго не претися, не осужатися, не бражничати, не просмеивати, не помнити зла, не гневатися ни на кого, к болшим быти послушну, и покорну, к средним любовну, к меншим и убогим приветну и милостиву, со всяким управа без волокиты, ноипаче наимита наимом не изобидети, а всякая обида со благодарением терпети Бога ради, и понос, и укоризна аще по делом поносят и укаряют, сие с любовию приимати, и от таковаго безумия отвращатися в против не мстити, аще в чем не повинен за сие от Бога мзду приимеши а домочатцев своих учи страху Божию, и всякои добродетели, и сам тая же твори, и вкупе от Бога обрящете милость, аще ли небрежением и нерадением сам или жена мужним ненаказанием согрешит или что зло сотворит, и вси домочадцы мужи и жены и дети господаревым ненаказанием каков грех или что зло сотворят, или брань или татьбу, или блуд все вкупе по делом своим приимут зло сотворшии муку вечную, а добро сотворшии Богу угодно поживше, жизнь вечную наследят в Царствии Небеснем.



22. Каковы люди дерьжать и как о них промышлять во всяком учении, и в божественых заповедеи, и в домовном строении
А людеи у собя добрых дворовых держати чтобы были рукоделны кто чему достоин и какому рукоделию учен, не вор бы не бражник не зерьщик, не тать не разбоиник, не блудник не чародеи, не корчмит, не оманьщик, всякои бы человек у доброго государя научен страху Божию, и вежьству и смиренью и всяким добродетелем, доброму промыслу не солъгал, ни розбил, никово бы не обидел сыт бы был государевым жалованьем да оден, или своим рукоделием, а чем государь пожалует платьем или лошадь и всяким нарядцом, или пашенькою, или кокою торговлею, а и сам что замыслит своими труды, ино лучшее платенко верьхнее и нижнее и рубашка и сапог блюсти по празником и при добрых людех в ведро а всегды бы было чистенко и не изваляно, и не изгрязнено и не излито, и не измочено и не измято, а которыи человек глуп, и груб и невежда и небрежен, а и есть у нево платенко, государьско жалованье или своими труды зделано, да беречи не умеет, ино государю или кому приказано, у таких нечювьсьтвеников, платье берегут у собя лучшее, дадут коли во время надеть да опять снемше у собя блюдут а всем дворовым людем наказ, всегда што делают в ветшаном платье а как пред государем и при людех в чистом во вседневном платеицы, а в празники и при добрых людех или с государем или с государынею где быти ино в лучшем платьи, а беречи от грязи, и от дожжа и от снегу и пришед да сняв платеице высушит да вымять, и вытереть, и выпахать хорошенко укласть и упрятать где то живет, ино и себе мило и от людеи чесно и государю споро и слушкам прочно, и всегда внове, а люди б были во чти в грозе и во всяком дозоре промеж бы собя не кралися, чюжево бы отнюд не хотели ни коими делы а государьского бы берегли все за один, а государю бы и государыни не лгали и не клеветали ни на кого ни в чем а государи бы тем не потакали обыскивали бы прямо ставя с очеи на очи, дурному бы не попущали а доброго бы жаловали ино всяк добру ревнует, и государьское жалованья хочет выслужить правдою и прямою своею службою, и государьским наказом и добрым науком век живет, и душу спасет и государю служит и Богу угодит, да наипаче указывати которым вместно к церкви Божии всегда ходити и по празником или во дворе петья слушати, и особ наедине молитися, читота телесная

хранити от всякаго блуда, и пьяньства, и лакомъства, и от безвременнаго пития и ествы, и обьядения и пияньства воздержатися, и отцов бы духовных и з женами своими имети и на покаяния приходили а женатые с своими женами законно бы жили по духовнаго отца наказанию, от жен бы своих не блудили а жены от мужеи, да чему сам от государя научен тово бы и жены наказывали, всякому страху Божию и вежству, и государыни бы слушали и повиновалася во всем, и своими труды и рукодельем выслуживала а не крала бы и не лгала, и не бляла и не бражничала, и з дурными речьми к государыни не приходила, и волхвов, и с кореньем, и з зельем кто тем промышляет, с теми бы отнюд не зналася и государем бы про таких людеи не сказывали, то бо суть слуги бесовския, служили бы государем своим верою и правдою и добрыми делы, и праведными труды, а государи бы и государыни людеи своих и поили, и одевали и в тепле бы жили и во всяком покои и в благоденьстве всегда и государи бы себя и свою душу и дом свои добре строив, и домочадцов безо всякия скорби, тоже нищих и странных и убогих вдовиц и сирот покоити достоино от своих праведных трудов и к церквам Божиим и церковником, и в монастыри приносити милостыня и к себе в домы своя призывати ино то и Богу приятно и души полезно, а отнюд бы не вмещалося в дом ни от насилия ни от грабления, ни от всякого мшелоимъсътва, ни от посулу ни от поклепу ни от резоимъства ни от ябедничества, ни от крива суда аще от сего зла Бог соблюдет тот дом будет благословен отныне и до века.



23. Како врачеватися християном о болезни и от всяких скорбеи
Аще Бог пошлет на кого болезнь, или какую скорбь, ино врачеватися Божиею милостию, да слезами да молитвою да постом, да милостынею к нищим, да истинным покаянием, да благодарение, и прощение и милосердие, и нелицемерная любовь ко всякому, да отцов духовных подьвизати на моление Богу и молебны пети и вода святити с честных крестов и со святых мощеи, и с чюдотворных образов, и маслом свящатися да и по чюдотворным по святым местом обещеватися и приходяще молитися, со всякою чистою совестию, тем целба всяким различным недугом от Бога получити, да от всяких грехов удалятися, и впередь никакова зла не творити, а отцов духовных заповеди хранити и епитемъи исправляти, тем очиститися от греха, и душевная и телесная болезнь исцелити, и Бога милостива сотворити, и всякому християнину целити себе от всяких различных недуг, душевных и телесных, и душетленных и болезненых страстеи, жити по заповедем господним, и по отеческому преданию, и по християньскому закону якоже в начале писано книги сея от первыя главы вся пятьнадесять глав и прочая главы книги сея такоже, 25, глава внимати и достоит творити ино и Богу угодить и душу спасет и греха избудет и здравие получит душевное и телесное и вечных благ наследник будет, а кто безстрашен, и бесчинен, страху Божию не имеет, и воли Божии не творит и закону християньского и отеческаго предания не хранит о церкви Божии и о церковном пении и о келеином правиле и о молитве, и о всяком славословии Божии не радит, ест и пиет без воздержания, и во обьядение и в пияньство, и не в подобно время, и законного жительства не хранит, недели и среды и пятка и празников, и Великого Поста, и Богородичьна без воздержания блудить и не в подобно время, и чрез естество и содевают, и всяко скаредие творят и всякие, богомерзские дела, блуд нечистоту сквернословие и срамословие песни бесовские бубны трубы сопели, всяко бесовское угодие и всякое бесчиние, и бесстрашие, к сему ж чарование, и волхвование и наузы звездочетье рафли алнамахи чернокнижье воронограи шестокрыл, стрелки громныя, топорки усовники дна камение кости волшебныя, и иныя всякия козни бесовския или кто чародеиством, и зелием и корением и травами на смерть, или на потворьство окормляет, или бесовскими славами, и мечтаньми, и кудесом чарует на всякое зло, или на прелюбодеиство или кто кленется именем Божиим во лжу или клевещет на друга, туто ж прочти и 24 главу в тех во всех делех, и в обычеех и нравех востает в человецех гордость ненависть злопомнение гнев вражда обида, лжа татьба клятъва срамословие и сквернословие и чарование и волхвавание, смех кощуны обьядение пияньство безвременное и рано и позно и всякая злая дела, и всякии блуд, и всякая нечистота и благии человеколюбец Бог не терпя в человецех таких злых нравов и обычаев, и всяких неподобных дел, якоже чадолюбивыи отец скорбьми спасает, и ко спасению приводит, показуя и наказует за премногия грехи наша смерти же скорыя не предаст, не хощет смерти грешничи, но ожидает покаяния еже обратитися и живу быти ему, аще не обратятся, и не каются от злых дел, наводит грех ради наших, овогда глад ово мор, ово пожар, ово потоп, ово пленение от поганых и градом разорение, и церквам Божиим и всякои святыни потребление и всякому стяжанию расхищение овогда от царска гнева разграбление имению, и самому казнь без милости и поносная смерть и от разбоиник и от татеи окрадение и от судеи продажа и мучение, ово бездожие ово безвременные дожди, и нестроиные лета и зима неугодна и лютые мразы, и земли бесплодие и всякому животному скоту и зверем и птицам и рыбам и всякому обилию скудость, родителем, и жене и чадом, нужными и напрасными и съкорыми смертьми лишение от многоразличных нужных и тяжких недугов страдания, и злескончание, и о всех сих настоящих бедах не уцеломудримся и не накажемся и в покаяние и в чювство, и в страх не внидем, видя таково праведного гнева Божия наказание за премногия грехи наша и паки Господь наказуя ны, и обращая к покаянию якоже и долготерпеливаго Иова искушая, посылая различныя скорби и болезни, и тяжкия недуги от духов лукавых мучение, телу согнитие костем ломота, оток и опухол на все уды проходом обоим заклад и камень во удах и глухота и слепота и немоста в утробе терзание и блевание злое, и на низ во оба прохода кровь и гнои и сухотная и кашель, и главоболение, и трясение, и всякие тяшкие различные недуги наказание гнева Божия и сия вся грехи презрехом и в покаяние не внидохом, ничто же не уцеломудри ни устраши и не накажемъся, о сем видя Божие наказание на себе и болезни тяшкие оставя Бога создавшаго ны и милости и прощение грехов от Него не требуя еже зле содеяхом, и приступихом к нечистым бесом от них же отрекохомъся во святом крещении и всех дел их, и призываем к себе чародеев и кудесников, и волъхвов и всяких мечетников и зелеиников и с кореньем от них же чаем душетленныя, и временныя помощи, и уготоваем собя дияволу во дно адово во веки мучитися, о безумнии человецы оле неразумия вашего не разсужаем своих грехов за што ны Бог наказует и не каемся о них, и не престаем от злоб и от всяких неподобных дел не помышляем вечнаго но желаем тленнаго и временнаго, престаните от злоб и от всяких душетленных дел и очистим себе истинным покаянием, яко милостив Господь помилует от грех, и подаст телесем здравие, и душам спасение и вечных благ не лишит аще кто потрудится в сем веце Царства ради Небеснаго, писано бо есть во святом Апостоле многими скорбми подобает нам внити в Царство Небесное, во святом Еуаггелии речено бысть ускии и прискорбныи путь вводяи в живот а широкии и пространныи вводяи в пагубу, и паки рече Господь нужно есть Царство Небесное, и нужницы восхищают е.



24. О неправедном житии
А кто не по Бозе живет не по християньскому житию чинит всякую неправду и насилие и обиду силно отоимет, возмя не заплатит волокитою уморит, а молода человека во всем изобидит, а на суседьсьтве кто не добр, или в селе на своих християн или на приказе или на власти дани тяжкия, и всякие уроки незаконныя накладывает или чужую ниву попахал или лес посек или землю переорал или луг перекосил, или ловлю рыбную переловил или борти или перевесье и всякую ловлю, и всякое угодье неправдою и насилием сотворит или ограбит или покрадет или розобьет или кого чим поклеплет, или кого чим подкинет или чим ополичьнит или напрасно кого продаст, или в работу неповинных лукавьством или насилием охолопит, или непрямо судит или неправено обыскивает или накриве послушествует, или кающимся немилостив, или лошадь или всякую животину и всякое стяжание и села или винограды, или дворы и всякое угодие силою отимет, или дешево в неволю купит или ябедничеством вытяжет или корчемным прикупом, или лихвы, и всяким лукавным ухищрением, и неправедным собранием или росты и насъпы и мыта всякия неподобныя дела блуд нечистоту сквернословие, и срамословие, и клятвопреступление и ярость и гнев и злопамятство сам государь или государыня творят или дети их или люди их или крестьяне их, а они государи о том не возбраняют и не обороняют и управы не дают прямо и все вкупе будут во аде, а зде прокляти, ино во всех тех плодех не благословеных а от Бога не помилован, а от народа проклят а обидимии Богу вопиют а своеи души на погибель а дому тщета и все проклятое а не благословеное и носити, и ясти и пити то все стяжание и плоди не Божии но бесовские низходят во ад живы душа их тако творящих а от них всякого обилия и плодов от таковых неприятна Богу милостыня, ни при животе ни по смерти, аще хощете вечныя муки избыти отдаи неправедное обидимому, и каися вперед тако не творити со всеми своими еже есть писано скор Господь на милость Свою, истинно кающихся приемлет, и великим грехом свободу дарует.



25. О праведном житии аще кто по бозе живет и по заповедем господним и по отеческому преданию и по християньскому закону, аще ли властелин судит праведно и нелицемерно всем равно богату и убогу, и ближнему и далнему доволни будут уроки праведными, и творити
Аще ли в селех такоже и во граде и на соседьстве хто добр и у своих християн, или на власти, или на приказе праведъныя уроки в подобно время емлет, не силою и не граблением и не мучением а коли что не радилося а заплатити нечим и он наровит, а у суседа, или у своево християнина чево не достало на семена, или лошади или коровы нет, или государьские дани нечим заплатить ино ево ссудити и подмочи, а у самого мало ино заняти а о них болезновати от всея душа, а ото всякаго обидящаго беречи их в правде, а сомому и людем твоим отнюд никово ни в чем не обидети ни в пашне ни в земле ни в домашнем ни в каком запасе ни в животине, и всякаго неправеднаго стяжания не желати, благословеными плоды и праведным стяжанием жити подобает всякому християнину и видя Бог ваша добрая дела и такову милость и нелицемерую любов ко всем и правду во всем, и подаст Бог богатую милость, и гобину плодом и всякого изобилия умножит, и милостыня та от праведных трудов и Богу приятна и молитву их Бог услышит и от грехов свободит и жизнь вечную дарует.



26. Како жити человеку сметя свои живот
А во своем во всяком обиходе, и в лавочном и во всяком товаре и в казне и в полатах, или в дворовом во всяком запасе или в деревенском или в рукодельи и в приходе и в росходе и в заимех и в долгех всегда себе смечать и потому живешь и обиход держишь по приходу и росход.



27. Аще кто не разсудя себя живет
Всякому человеку богату и убогу велику и малу разсудити себя и сметити по промыслу и по добытку и по своему имению а приказному человеку сметя собя по государьскому жалованью и по доходу и по поместью и таков двор себе держати, и всякое стяжание и всякои запас, по тому и люди держати и всякои обиход, по промыслу и по добытку по тому и ести и пити, и носити и людеи одевати, и с людми сходитися з добрыми аще кто не разсудя собя и не сметя своего жития, и промысла и добытка и учнет на люди глядя жити не по силе, и заимуя, или неправедным имением и та честь будет с великим бесчестием и со укоризною, и с поношением в злое время нихто ему не поможет, а от Бога грех а от людеи посмех, ино надобе всякому человеку тщеславия бегати и похвалы, и неправеднаго собрания, жити по силе и по промыслу, и по смете, и по добытку своею правою силою ино то житие благоприятно и богоугодно, и от людеи похвално, и себе и детем своим прочно.



28. Аще кто слуг держит без строя
А толко людеи держат у собя не по силе и не по добыткам, а не удоволити его ествою и питием, и одежею, или которои не рукоделен и собою не умеет промыслити ино тои слуги мужику или женки, или девки, у неволи заплакав, и лгать и красть, и блясть, а мужиком и розбивать и красть, и в коръчме пити и всякое зло чинити и тому безумному государю и государыне от Бога грех а от людеи посьмех и не суседьство со всяким а от суседеи продажа и тщета дому и сам оскудеет за скудость ума.



29. Поучати мужу своя жена, как Богу угодити и мужу своему уноровити, и како дом свои добре строити, и вся домашняя порядня, и рукоделье всякое знать и слуг учить и самои делать
Подобает поучити мужем жен своих, с любовию и благоразсудным наказанием, жены мужеи своих вопрошают о всяком благочинии како душа спасти Богу, и мужу угодити, и дом свои добре строити и во всем ему покарятися, и что муж накажет то с любовию приимати и творити по его наказанию, перьвие имети страх Божии и телесная чистота яко же впреди указано бысть востав от ложа своего предочистив себе и молебная совершив женам и девкам дело указати дневное всякому рукоделию что работы дневная ества варити, и которои хлебы печи ситные и решетные, и сама бы знала как мука сеяти как квашня притворити и замесити и хлебы валяти и печи и квасны и бухоны и выпеклися, а колачи и пироги тако же, и колко муки возмут и колько испекут и колко чево родится ис четверти или из осмины или из решота, и колко высевков и колко испекут мера знати во всем а еству мясную и рыбную, и всякие пироги и всякие блины и всякие каши и кисели и всякие приспехи печи и варити все бы сама государыня умела, ино умеет и слуг научити, и все сама знает а коли хлебы пекут тогды и платья моют ино с одного сьтрепня и дровам не убыточно, и дозирати как красные рубаши моют и лучшие пълатья, и колко мыла идет и золы и на колко рубашек, и хорошо бы вымыти и выпарити, и начисто выполоскати и иссушити и искатати, и скатерти и убрусы и ширинки и утиралники такоже и всему счет самои знати и отдати и взяти все сполна, и бело и чисто, а ветчано вежливо бы поплачено ино сироткам пригодитца а коли хлебы пекут ино того же теста велети отняти и пирогов начинити а коли пшеничьное пекут и семъе из межьситки велети пирогов зьделати в скоромне дни скоромною начинкою какая лучится а в посные дни с кашею или з горохом или с соком, или репа или грибы или рыжики, или капуста что Бог лучит ино семъе потешенье, и всякую бы еству и мясную, и рыбную и всякои приспех скоромнои и поснои жена сама бы знала и умела зделать и слушку научить то государыни домовная, и домоводицы добрые и то бы знала же пивнои медовои и виннои и бражнои кваснои и уксуснои, и кислаштянои и всякои обиход как делают, и повареннои и хлебнои, и в чем что родится, и колко ис чево будет коли все знает, доброго мужа наказанием и грозою, и своим добрым разумом ино все будет споро и всево будет много, а которая женьщина или девка рукодельна и тои дела указати рубашка делати, или убрус брати, или ткати или золотное или шелковое пяличное дело и которая чему учена того всего досмотрити, и дозрети и всякои мастери самои прядено, а тафта и камка и золото и серебро отвесити и отмерити, и сметити, и указати сколко чего надобно, и сколко чего даст и прикроити и примерити самои все свое рукоделие знати а малых девок учити которая чево пригоже а мужним женкам которые черное дело делают избу топят и хлебы пякут и платья моют тем лен дают на собя и на мужа и на дети прясти а одиная жоночка или девка на государя лен прядет, а изгребии и начеси на собя или как пригоже а все бы ведала сама государыня которои дело какое дасть колко чево даст и колко чево возмет и сколко чево зделает кто днем много ли мало и сколко ис чево выидет то бы сама все знала и в счете бы было все, а сама бы государыня отнюд никако же, никоторыми делы опрично немощи без дела не была ино и слушкам на нее смотря повадно делати муж ли придет гостья ли обычная придет всегды бы над рукоделием сидела сама то еи честь и слава и мужу похвала, а николи же бы слуги государыни не будили государыня бы слуг будила, а ложася бы спать всегды от рукоделия молебная совершив.



30. Добрые жены рукоделные плоды, и береженье всему и что скроит и остатки и обрески беречи
А добрая домовитая жена благоразумным своим помыслом, и мужним наказанием, и добрым подвигом своих трудов с слушками полотен и усчин, и холъстов наделано да на што пригоже ино окрашено на летники и на кавтаны и на сарафаны, и то у неи на домашнеи обиход перекроено и перешито, а будет слишком за обиходом наделано, полотен или усчин или холстов или скатертеи или убрусов или ширинок, или иного чего ино и продаст ино што надобе купит, ино того у мужа не просит а рубашки красные мужьские и женьские и порты то все самои дати при себе кроити, и всякие остатки и обресъки камчатые и тафтяные и дарагие и дешевые и золотное и шелковое, и белое и красное и пух и оторочки и споръки и новые и ветшаное все бы было прибрано мелкое в мешечках а остатки сверчено и связано а все розбрано по чисълу и упрятано и как чево поделат ветшана или у новаго не достало а то все есть в запасе в торгу того не ищешь дал Бог, у доброго промысла у совершенаго разума все ся лучило дома.



31. Как всякое платье кроити и остатки и обрески беречи
В домовитом обиходе коли лучится какое платья кроити себе или жене или детем или людем, камчато или тафтяно или изуфрено, или кушачно или зенденинное или сукняное, или армячное или сермяжное или кожи какие краити или сагадак или на седло или ометюк или сумы или сапаги или шуба или кафтан или терлик или однорятка или картель или летник и каптур, или шапка или нагавицы, или какое платно ни буди, и сам государь или государыня смотрит и смечает остатки и обрески живут и те остатки и обрески ко всему пригожаютца в домовитом деле поплатить ветчаново товож портища или к новому прибавить или какое ни буди починить а остаток или обрезок как выручить а в торгу устанешь прибираючи в то лицо в три дораги купишь а иногды и не приберешь, а коли лучится какое платно кроити молоду человеку сыну или дщери или молодои невеске летник или кортель или шуба с поволокою или опашень зуфрян или камчат или обьярь, или отлас или бархат или терлик или кафтан и што ни буди доброе и кроячи до згибати, вершка по два и по три на подоле и по краем и по швом и по рукавом, и как вырастет годы два или три или в четыре и роспоров то платно и загнутое отправит опять платно хорошо станет кое платья не всегда носити то так краити.



32. Всякая порядня домашняя держати
А всякому рукоделью и у мужа и у жены, всякая бы порядня и снасть была в подвории и плотницкая и портново мастера и железная и сапожная, и у жены бы всякому еи рукоделью и домовитому обиходу всякая бы была порядня своя, и держано бы то бережно где что пригоже ино что себе ни зделал и нихто ничево не слыхал, в чюжии двор не идешь ни пошто свое без слова а поваренная порядня и хлебная, а все бы было у собя сполна и медяное и оловяное и железное, и деревяное каково ся лучит, а лучится у кого кокая ссуда взять или свое дать саженье или мониста или съкрута женьня судно серебряное или медяно или оловяное или какое платно и како ни буди запас пересмотрити и нового и ветшаного, где измято или избито или утло или што где изваляно или подралося, и которая на чем ни буди притча или што не цело, и все то, исчести и сметити и записати и хто емлет и хто дает обема то бы было ведомо а что весовое то бы извешено, и всякои ссуды бы цена поставлена по грехом какова притча станетца ино на обе стороны хлопотов и остуды нет ино тому платежь, а всякая ссуда имати и давати в честь и беречи паче своего и отнести на срок чтобы сами государи того не просили и по то не посылали ино и впредь дадут и дружба впрок, а толко чюжаго не беречи или не срок не отнести или испортив отдать ино остуда в век и убыток в том, и продажа живет и впередь нихто ни в чем не верит.



33. По вся государыни дни дазирати у слуг всего и домашнеи порядни и рукоделья и о самои еи и о всяком бережении и строении
А по вся дни государыня у слуг дазирает которые пекут и варят и всякие приспехи делают и которые всякое рукоделие делают и которая служька хорошо делает по приказу или есть варит или хлебы печет или колачи или пироги или какие нибудь приспехи или какое рукоделие зделает хорошо и за то слушка примолвити и пожаловати и есть подати и по преже писанному как дворовым людем от государя бережение и по службе смотря, а хто худо и не по приказу зделает или не слушает или ленитца или испортит што или нечисто стряпает или крадет ино по преже писаному наказанию учити как от государя слугам живет впереди о том наказании писано как кого пожаловати или наказати или научити а в горнице и в комнате и в сенех и на крыльце и на леснице всегда бы было чисто и рано и позно а стол и суды всякие всегда чисто мыти, и скатерть чиста а сама бы государыня всегда была устроина во всяком обиходе, таковыи бо у нее служки были вежливы по преже писаному а с слугами бы государыня пустошных речеи ни пересмешных отнюд не говорила ни торговки ни безделные женки ни волхвы никако не приходили а постеля и платья по гряткам и в сундукех и в коробьях, и убрусы и рубашки и ширинки все бы было хорошенко и чистенько и беленко уверчено и укладяно и не перемято и не сполщено а саженье и мониста и лучшее платья всегда бы было в сундукех и в коробьях за замком а ключи бы держала в малам ларце а все бы ведала сама.

Иллюстрация: Боярыня в тереме с детьми и гусляром. XVII век

Источник: Домострой. СПб.: Наука, 1994. (Серия "Литературные памятники".)

Электронный источник: http://www.sv-rus.ru